Priso ang duha ka babayi kag isa ka lalaki nga bag-o lang nakabaton sang social amelioration cash grant matapos nagbaligya sang ginapatihan iligal nga druga sa mga otoridad sa Victorias City, Negros Occidental kagab-i.
Alas-7:30 sang gab-i sang ginpatigayon ang drug buybust operation sa Villa Miranda, Barangay 6A, Victorias City nga nagresulta sa pagkaaresto nanday Maricar Dolendo, 37-anyos, kasado kag residente sang Barangay 6A; Jerson Miranda, 29-anyos, sultero kag residente sang amo man nga barangay; kag Belen Castro, 42-anyos, single kag residente sang Barangay Mambulac, Silay City.
Matapos mabaklan sang isa ka sachet sang suspected shabu, nakuhaan pa gid ang tatlo sang anom ka sachet sang iligal nga druga nga nagabalor tanan sang indi magnubo P20 mil.
Suno sa Victorias City Police Station, bag-o lang gid nakabaton sang social amelioration nga P6, 000 ang mga arestado.
Sa karon, ginahanda na ang kaso nga paglapas sa Section 5 kag Section 11 sang Republic Act 9165 ukon Comprehensive Dangerous Drugs Act of 2002 batok sa ila.
