Ginsibtan na sang medalya sang pagkilala sa ila pagkabaganihan ang apat ka mga suldado sang 94th Infantry Batallion nga nasamaran sa engkwentro batok sa New People’s Army terrorists sa Brgy. Carabalan, Himamaylan City, Negros Occidental sang Domingo sang aga.
Ginpangunahan ni 303rd Infantry Brigade Commander Colonel Inocencio Pasaporte ang pagsibit sang Wounded Personnel Medal (WPM) kanday Corporal John Cris Laus, Corporal Lismer Jade Tumayao, Private First Class John Paul Geonzon kag Private First Class Alexis Mepranum para sa exemplary action sang nagluntad ang engkwentro.
Madumduman nga ang 94IB ang nagpatigayon sang community security patrols sa Brgy. Carabalan, Himamaylan City, bilang pagresponde sa report nga may yara sang presensya sang NPA sa lugar nga nagapang-extort sang kwarta kag bugas sa mga residente.
Kabahin man ini sang paghatag sang seguridad sa mga benepisyaryo sang Social Amelioration Program (SAP) sang DSWD para sa mga pamilya bangud ssa coronavirus 2019 (COVID-19).
Suno kay Pasaporte, ang medalya ang nagasimbolo sang pagkabaganihan sang mga suldado sa pag-atubang sa ila common enemy, ang terroristang NPA kag nagasaludo ini sa tanan sa ila nga selfless service kag dedication sa pagserbe sa mga tawo kag pagprotekta sa katawhayan sang Negros.
