Wala ginhaya ang bangkay sang COVID Patient No. 8 sa ciudad sang Bacolod.
Suno kay Melanie Regis, purok president sang Purok Sabes, Brgy. Villamonte kun sa diin nagapuyo ang 69-anyos nga biktima, wala ginpaembalsamar kag gilayon nga ginpalubong ang pasyente sang narelease ini sa morgue sang Corazon Locsin Montelibano Memorial Regional Hospital.
Suno kay Regis, naghingyo siya sa pamilya nga indi na pagdal-on sa ila purok ang bangkay nga gilayon naman nga naintindihan sang mga ini kag ila ginsunod ang mando nga makipag-angot sa kapitan agud mahatagan sang bulig sa pagpalubong.
Suno pa kay Regis, may ara na nga ginabatyag nga sakit sa likod si Patient No. 8 antes ini naadmit sa regional hospital sang Abril 9.
Sa karon, normal ang sitwasyon sa Purok Sabes apang wala ini nagakumpyansa kag nagmando sa mga nasakpan nga magpabilin sa mga panimalay.
May yara naman sang pulis nga nagabantay sa kada purok agud magpatuman sang pagsulundan.
Ginahingyo sini sa mga pumuluyo nga magpabilin nga nagakooperar sa otoridad.
Suno diri, makapila naman ginpaidalum sa pagdisinfect ang purok kag kahapon, liwat nga gindisinfect ang lugar.
