Gin-isa-isa sang pulmonary expert sa ciudad sang Bacolod ang mga tawo nga madasig nga malatnan sang masakit ilabi na ang coronavirus 2019 (COVID-19).
Sa interview sang Bombo Radyo Bacolod kay Dr. Renelo Sario, ginpahayag sini nga madasig malatnan sang COVID-19 ang naga-edad masobra 60, nagasuprer sang pulmonary illness kaangay sang asthma kag hypertension; ang mga nagapaidalum sa chemotherapy kag mga ginadialysis kag kalabanan nga ginabawian sang kabuhi ang mga gulang na.
Apang makabato naman sa nasambit nga balatian ang mga huben kag mga tawo nga wala sang ginasuprer nga balatian.
Samtang, ginpahayag man sini nga ang pagpabilin sa balay ang may dako nga posibilidad nga mahilway sa balatian apang indi naman luwas ang mga nagagwa-sulod sa balay agud magbakal sang kinahanglanon bangud mahimo nga naexpose naman ini.
Kadungan sini nagpanugyan ang doktor nga kun ang isa ka tawo ang nagahalin sa gwa sang balay sa pagbakal sang kinahanglanon ukon may ginkadtuan, nagakadapat lamang nga ibilin ang ginsuksok nga sapatos sini sa gwa sang balay kag gilayon nga sprayhan sang disinfectants kaangay sang bleach ukon alcohol kag gilayon man nga magpaligo antes pa man magpalapit sa iban nga katapo sang pamilya.
Gin-athag man sini nga wala man gina-discourage ang pagpangspray sang alcohol agud mangdisinfect apang dapat wala sang tawo bangud mahimo nga matrigger ang balatian sini kun nagasuprer sang pulmonary illness kaangay sang asthma.
Ipabilin man ang social distancing kag pagpractice man sang proper hygiene.
Suno kay Sario, madamo man sang mga alternatives nga mahimo nga himuon agud nga mapabilin nga fit and healthy.
