Ginbalibaran sang Negros Occidental ang pagbaton sa 88 ka mga seafarers nga nastranded sa Metro Manila bangud sa enhanced community quarantine kag natalana nga magaabot diri sa probinsya subong nga semana paagi sa trip nga gin-arrange sang Maritime Industry Authority (MARINA).
Sa interview sang Bombo Radyo kay Dr. Jonathan Lobaton, commander sang Provincial Incident Management Team (IMT), ginkumpirmar sini nga nagpadala sila sang sulat kay Regional Risk Reduction and Management Council (RDRRMC) 6 director Jose Roberto Nuñez agud ipahibalo ang pagbalibad sang Negros Occidental.
Suno diri, indi maakomodar sang quarantine facilities sang probinsya ang mga seafarers kag nakatuon naman ang Kapitolyo sa natabo sang Abril 14 kun sa diin may duha ka OFWs nga ginrepatriate nagikan sa Cebu nga nagpositibo sa COVID.
Nagalaom naman ini nga ikonsiderar sang inter-agency task force ang hingyo sang Negros Occidental kag indi pagdayunon ang trip nga magahalin sa Metro Manila subong nga Abril 27.
Gin-athag sini nga wala ginapunggan sang provincial government ang pagpauli sang mga ini bangud mandato sang provincial kag national government nga sila ang papaulion sa tagsa ka provincial address.
Suno kay Lobaton, luyag man sang provincial government nga papuli-on ang mga ini apang may yara sang mga bagay kag protocol nga dapat pagasundon.
Bangud sa leksyon nga nakuha sag mga nauna na nga mga OFWs nga nagpauli nagikan sa Cebu, kinahanglan nga magdoble sa paghalong ang probinsya bangud aminado ini nga mabudlayan ang probinsya sa tion nga may yara sang makalusot nga positibo sa nasambit nga virus.
