Ginlockdown na ang kabahin sang Purok Bayanihan, Barangay Banago, Bacolod City matapos nagpositibo sa coronavirus disease 2019 (COVID-19) ang isa ka residente diri.
Madumduman nga suno sa Department of Health, ang 65-anyos nga babayi nga residente sang Purok Bayanihan, Barangay Banago ang nagsuprer sang ubo sang Abril 3 kag nagpakonsulta sa City Health Office sang Abril 17 kun sa diin ginkuhaan ini sang swab sample nga ginpaidalom sa laboratory test sa Iloilo City kag sa karun yara na sa isolation facility ang pasyente.
Sa interview sang Bombo Radyo Bacolod kay Punong Barangay Ricky Mijares, 78 ka pamilya ang nagapuyo sa 35 ka mga balay sa sulod sang 50-meter radius nagikan sa balay sang senior citizen.
Nahatagan naman sang food packs ang mga residente sa lugar kag ini ang nagaunod sang pito ka kilo nga bugas, noodles kag de latas.
Nagdonate man sang tubig ang Bureau of Fire Protection (BFP) Bacolod agud ipaligo sang mga residente sang nasambit nga lugar.
Ginpasalig man sang punong barangay sa mga pumuluyo nga ihatag sang barangay kag sang city government ang kulang sa Purok Bayanihan kaangay sang alcohol kag facemasks.
May presensya naman sang kapulisan ang lugar agud masiguro ang siguridad sang mga pumuluyo.
Nagapasalamat man ini sa bulig sang mga pumuluyo kag wala gindiscriminate ang pasyente kasubong man ang pamilya sini.
Naghingyo man si Mijares sang padayon nga pagsuporta kag pagbuligay.
