Magahinun-anon ang Bacolod City officials upod ang Overseas Workers Welfare Administration (OWWA) sa mga seafarers nga naka-quarantine karon sa Graciano Lopez Jaena Elementary School agud hitsuhon ang isyu angot sa ila akomodasyon.
Sa interview sang Bombo Radyo Bacolod kay Vice Mayor El Cid Familiaran, chairman sang inter-agency task force against coronavirus sa ciudad, ginpahayag sini nga nagcontact na siya kahapon sa OWWA agud ipahibalo ang reklamo sang mga seafarers angot sa quarantine facility.
Suno sa iya, naghingyo man ang mga seafarers nga maga-istorya sa city officials upod sa OWWA agud ma-settle ang isyu.
Pananglitan nga mahitso, isaylo ang mga seafarers sa hotel agud mahatagan sang mas komportable nga akomodasyon para sa 14-day quarantine nila.
Gin-athag naman sini nga depende sa OWWA ang pagasayluhan sang mga seafarers bangud ini nga ahensya ang magasabat sang gasto.
Aminado man si Familiaran nga wala naka-preparar ang ciudad bangud gulpyada ang paghambal sa ila nga may yara sang maabot nga mga repatriated OFWs kag seafarers.
Gani nagtinguha sila nga mabutang ang mga ini sa quarantine facility sa Graciano Lopez Jaena Elementary School.
Gin-athag man sang bise alkalde nga wala nila ginlauman ang nasambit nga batch sang mga seafarers bangud Marina ang nagpatigayon sini kag wala nagpakig-angot anay sa ila agud maka-preparar man.
Suno sa iya, una na nga nagnegosyar ang ciudad sa OWWA para sa mas nauna nga mga OFWs nga na stranded sa Manila apang nauna abot ang mga seafarers.
Pasalig ni Familiaran nga ginatinguhaan gid nila nga masabat ang mga problema subong nga may yara sang COVID-19 pandemic.
