Naghingyo na ang gobernador sang Negros Occidental sa Overseas Workers Welfare Administration (OWWA) agud mabuligan ang mga Negrense OFWs nga ginpang-repatriate ilabi na sa akomodasyon sang mga ini.
Suno kay Governor Eugenio Jose “Bong” Lacson, nakabaton na ini sang tawag nagikan sa OWWA kag ginpasalig sang ahensya nga nagapakig-angot na sila sa mga hotels para sa mga OWFs nga nagbalik diri sa probinsya agud mahatagan sila sang mas maayo nga akomodasyon.
Nahibaluan nga ang mga ginpang-repatriate nga mga OFWs kag Negrense ang nagatinir karon sa Provincial Healing Center sa banwa sang EB Magalona para sa ila mandatory 14-day quarantine.
Samtang, ginkumpirmar naman ni Dr. Zeaphard Gerhart Caelian, pinuno sang Provincial Disaster Management Program Division, nga may yara naman sang manug-abot nga mga seafarers.
44 liwat ka mga slots ang ginhatag sa probinsya apang suno kay Caelian magadepende ini sa gihapon sa kun pila ka OFWs ang makasaka sa barko.
Suno diri, ipaidalom sa rapid test ang mga returning Negrense kag indi sila pagpasakaon sa barko kun mangin reactive sila.
Ginpasalig man sini nga may yara na sang husto nga koordinasyon ang Maritime Industry Authority (Marina) kag OWWA sa provincial government.
Indi kaangay sa nauna nga batch sang mga seafarers nga gulpyada ang pagpadala sang Marina sa mga ini sa probinsya.
