Nakatapos na sang mandatory 14-day quarantine ang 33 ka mga Negrense overseas Filipino workers (OFWs) nga na-stranded sa Cebu sadto nga gin-quarantine sa Provincial Healing Center sa banwa sang EB Magalona.
Suno kay Peewee Demonteverde sang Provincial Health Office, 35 kabilog kuntani ang mga ini apang nagpositibo ang duha.
Madumduman nga sanday Patient No. 3 kag Patient No. 4 ang nagikan sa grupo sang mga stranded OFWs nga ginrepatriate sang probinsya nagikan sa Cebu.
Si Patient No. 3 ang isa ka 38-anyos nga lalaki nga residente sang Silay City kag nagikan sa The Netherlands.
Samtang si Patient No. 4 naman ang isa ka 50-anyos nga lalaki nga taga-Candoni kag nagikan sa Finland.
Ang duha ka mga positibo ang nagapabilin sa gihapon sa Provincial Healing Center.
Suno kay Demonteverde, antes sila gin-release, ginpaidalom ang mga ini sa maid-id nga medical exam kag rapid testing.
Ginhatagan man sila sang certificate nga nagapamatuod nga nakatapos sila sang 14-day quarantine.
Suno kay Demonteverde, kinahanglan sang mga ini sa gihapon nga mag-home quarantine sa sulod sang pito ka adlaw bilang pagsunod sa precautionary measures.
Ginsugat naman sila sang mga ambulance sang kada local government unit (LGU) nga natungdan.
Sa record sang PHO, 343 na ka mga Negrense OFWs ang naka-quarantine sa EB Magalona.
154 diri ang na-release na samtang 189 naman nabilin kun sa diin 63 ang mga OFWs.
