Patay ang bodyguard sang alkalde sa banwa sang Hinigaran matapos nga gintiro sa Barangay Pilar sa nasambit nga banwa kahapon sang hapon.
Sa interview sang Bombo Radyo Bacolod kay Police Major James Latayon, hepe sang Hinigaran Municipal Police Station, ginkilala ang biktima kay Mariano Salazar, 60-anyos kag residente sang Barangay 1 sa amo nga banwa.
Sa imbestigasyon sang kapulisan, papuli na kuntani ang biktima halin sa iya babuyan sa Barangay Pilar sang hinali nalang ini nga ginluthang sa wala pa matumod nga suspetsado.
Una naman nga nakabaton sang report ang kapulisan nga may yara sang vehicular accident sa lugar apang sa pagpadulong sang mga ini, shooting incident gali ang nagluntad.
Suno kay Latayon, padayon pa nila nga gina-imbestigaran ang insidente agud nga matumod ang suspetsado kag kun ano bala ang motibo sa pagpatay sa biktima.
