Ginakasubo ni Bacolod City Mayor Evelio “Bing” Leonardia ang pagtaliwan ni Patient Number 3.
Nahibaluan nga ini ang ikaduha nga trahedya sa pamilya sang 40 anyos nga pasyente matapos magtaliwan man ang iloy sini nga si Patient Number 6 sang damlag lang.
Gintawgan ni Leonardia ang utod sang biktima agud ipalab-ot ang pakig-unong sang mga Balodnon sa tion sang sila ang nagabakho.
Madumduman nga si Patient #3 ang 40 anyos nga lalaki kag residente sang Barangay Taculing.
Ini ang may yara sang travel history sa Manila kag nag-abot sa Bacolod sadto Marso 8, 2020.
Nagdevelop ini sang ubo kag paghilanat sang Marso 15 kag gin-admit para sa isolation sa private hospital sadtong Marso 19.
Ang labing-una nga swab test ang ginkuha sang Marso 19 kun sa diin nakompirmar nga nagpositibo ini.
Samtang yara sa hospital nagsuprer ini sa stroke bangud sa depleted oxygen supply sa utok sini bangud sa kabudlay sa pagginhawa angot sa COVID.
Bangud sini, gin-intubate ini sa sulod sang anum ka adlaw matapos ang admission.
Ang repeat test ang ginhimo sadtong Abril 7 kag 10 kun sa diin nagnegatibo ini sa COVID-19.
Ginsaylo ini sadtong Abril 10 sa non-isolation room apisar nga respirator ini sa gihapon kag nagahulag lamang ini sa pain stimulus.
Nagpaidalom man ini sa Physical therapy kag nutritional preparasyon sa posible nga pagdischarge sini.
Apang masubo bangud subong nga adlaw sa ika-45 ka adlaw sini sa hospital , napatay ini bangud sa fatal heart attack.
