Luyag ni Negros Occidental Governor Eugenio Jose “Bong” Lacson nga palawigon pa ang implementasyon sang General Community Quarantine (GCQ) sa probinsya.
Nahibaluan nga natalana nga matapos ang GCQ sa Mayo 15.
Suno sa gobernador, ang GCQ ang isa ka “perfect quarantine model” nga dapat sa gihapon ipatuman sa kaangay sini nga sitwasyon.
Suno diri, indi pa siya makahambal nga hilway na ang probinsya sa pamahog nga dala sang coronavirus gani indi pa dapat pagtugutan ang paggwa-sulod diri.
Dugang pa ni Lacson, madamo naman nga sektor ang nagbukas humalin sang nagdowngrade ang probinsya sa GCQ.
Apang gin-athag sini nga maga-depende sa gihapon sa ipagwa nga guidelines sang national inter-agency task force ang iya mangin desisyon.
Samtang, nagakabalaka naman si Lacson pananglitan nga magbalik ang domestic flights pagkatapos sang Mayo 15.
Suno sa gobernador, ginakabig sini “major concern” kun magbalik na sa operasyon ang pila ka mga airline companies para sa domestic flights bangud indi na makontrol magasulod kag gwa sa probinsya.
Nahibaluan nga pila ka mga airline companies ang nagaplano sang partial resumption sang ila nga biyahe sa Mayo 16.
