Magapabilin lamang sa Saltimboca Tourist Inn ang duha ka mga panibag-o nga kaso sang coronavirus disease 2019 (COVID-19) nga narekord sa Bacolod.
Ini ang ginkumpirmar ni Vice Mayor El Cid Familiaran, chairman sang inter-agency task force against coronavirus sa Bacolod.
Suno kay Familiaran, indi na kinahanglan pa nga isaylo sanday Patients No. 10 kag 11 sa iban nga quarantine facility bangud nga tag-isa-isa man ang kwarto sang mga ini sa nasambit nga lugar.
May yara man sang naka-duty nga medical staff agud nga magbantay kag magmonitor sa ila.
Nahibaluan nga ang mga nagdugang nga kaso ang lunsay mga repatriated seafarers nga nagpauli sa Bacolod sang nagligad nga Abril 28.
Madumduman nga nagligad nga semana, nag-abot sa ciudad ang 28 tanan ka mga Bacolodnon nga overseas Filipino workers (OFWs) nga kalabanan seafarers nga nastranded sa Manila.
Gilayon ang mga ini ginpaidalom sa rapid test kun sa diin apat ang nagpositibo.
Ginkuhaan man sila sang swab sample para sa real-time polymerase chain reaction (RT-PCR) test kun sa diin duha ang nagpositibo.
Si Bacolod Patient No. 10 ang isa 27-anyos nga babayi, single kag residente sang Barangay Granada nga may travel history sa Italy samtang si Bacolod Patient No. 11 ang isa ka 42-anyos nga lalaki, kasado kag taga-Barangay Villamonte nga may travel history sa Japan.
