Tuman ang kalipay sang mga himata ni Bacolod City Patient No. 8 nga nakapauli na ang mga ini sa ila puluy-an sa Prk. Sabes Zone 2, Barangay Villamonte, kahapon matapos nga makagraduate sa 14 days quarantine.
Kadungan sini, ginbatak man ang pagpatuman sang lockdown sa amo nga lugar nga tuman ka ginkalipay sang mga pumuluyo.
Sa interview sang Bombo Radyo kay Christopher Galme, anak sang COVID patient no. 8 sa Bacolod, tuman ang ila kalipay nga natapos na nila ang 14-day quarantine sa Andres Bonifacio Elementary School kag wala man sang may nagpakita sang sintomas sang coronavirus disease.
Siyam tanan sanday Galme nga gin-quarantine sa ABES.
Suno diri, wala man sila napabay-an sa amo nga eskwelahan bangud madamo ang nagpalab-ot sang bulig kag wala man sila ginpabay-an sang Bacolod City government.
Ginpasalamatan man sini nga wala sila ginpabatyag sang mga kasilingan sa Purok Sabes sang diskriminasyon kadungan sang ila pagpauli.
Nalipay man ang mga ini bangod wala na sang kabalak-an nahanungod sa COVID-19.
