Dako nga kapierdihan para sa transport group ang pag-iban sang mga pasahero sa tion nga magbalik na ang public transport bangud sa ipatuman nga social distancing.
Sa interview sang Bombo Radyo Bacolod kay Jessie Ortega, Secretary General sang Sentrong Samahan ng mga Tsuper at Operators Negros (STONE), ginpahayag sini nga gintuman sang mga Public Utility Vehicles (PUV) drivers ang mando sang gobyerno nga pag-untat sang biyahe bangud sa ginapatuman nga Enhanced Community Quarantine (ECQ) agud malikawan ang paglapta sang coronavirus disease 2019 (COVID-19).
Suno kay Ortega, nagaapelar ini sa Land Transportation Office nga iregulate lang temporaryo ang pagpanukot sang mga operators sa drivers sang renta ukon boundary bangud katunga sang kapasidad sang PUJ ang madula agud maobserve ang social distancing kag makadawa-dawa man ang mga driver.
May yara naman sang patigayunon nga konsultasyon sa palaabuton nga Mayo 15 si Committee on Transportation head Dindo Ramos sa mga Public Transport Group agud istoryahan ang mga tikang nga pagahimuon sa tion nga ipatuman ang General Community Qurantine (GCQ) sa ciudad.
Samtang nagahingyo man ini sa Local Government Unit (LGU) nga mahatagan ang mga drivers bisan paano sang assistance bangud indi tanan ang nakabaton sang Social Amelioration Program (SAP) sang DSWD.
Una na ini nga nakig-angot ang LTFRB apang ginduso sa DSWD kag ginbalik man sa LTFRB tubtob nga nahulog na lamang sa pasalig ang cash aid para sa transport group.
Ginkompirmar sini nga kapin 70 porsyento lamang sang mga miyembro sini ang nakabaton sang ayuda nagikan sa gobyerno samtang wala gid sang nabaton ang 30 porsyento.
