Lunsay negatibo sa una nga swab test nga ginpatigayon sang Mayo 1 ang duha ka mga seafarers nga nagpositibo sa coronavirus disease 2019 (COVID-19) sa probinsya sang Negros Occidental kahapon.
Sa impormasyon nga ginpagwa sang provincial government, negatibo sa balatian sanday Negros Occidental Patient No. 8 kag 9 sa first swab test apang nagpositibo ang mga ini sa ikaduha nga swab test nga ginpatigayon sang Mayo 9 kun sa diin kahapon naggwa ang resulta.
Si Patient No. 8 ang isa ka 35-anyos nga lalaki nga tumandok sang Barangay Poblacion, Valladolid nga nag-abot sa Manila sang Marso 22 nagikan sa Miami, Florida.
Samtang, si Patient No. 9 naman ang isa ka 27-anyos nga lalaki nagikan sa Barangay Binubohan, Bago City nga nag-abot sa Manila sang Marso 20 nagikan man sa Miami via New York.
Ang duha ang lunsay asymptomatic kag naka-quarantine sa Bacolod City Facility Quarantine.
Sa karon, nagadangat na sa siyam ang kabug-usan nga kaso sang COVID-19 sa probinsya kag pito sa mga ini ang mga OFW repatriates.
Samtang, suno kay Dr. Zeaphard Gerhart Caelian, pinuno sang Humanitarian Cluster sang probinsya, nakagwa na sa Provincial Healing Center sa banwa sang EB Magalona ang duha ka mga repatriated OFWs nga nastranded sa Cebu kag nagpositibo sa COVID-19.
Ini amo sanday Patient No. 3 kag 4 nga nag-abot sa probinsya sadtong Abril 14 via Escalante port.
Suno kay Caelian, nagnegatibo na sa balatian ang mga ini sa duha ka mga swab test nga ginpatigayon.
Madumduman nga si Patient No. 3 ang isa ka 38-anyos nga lalaki nga tumandok sang Silay City kag nag-abot sa Pilipinas sang Marso 24 nagikan sa The Netherlands.
Samtang, si Patient No. 4 naman ang isa ka 41-anyos nga lalaki nga tumandok sang Candoni kag nag-abot sa pungsod sang Marso 17 nga may travel history sa Ireland, Finland kag Singapore.
