Nagahingyo si Negros Occidental Governor Eugenio Jose “Bong” Lacson nga sa Hunyo 1 buksan ang mga seaports kag airports sa probinsya.
Sa interview sang Bombo Radyo Bacolod kay Provincial Administrator Atty. Rayfrando Diaz, ginkumpirmar sini nga nagpadala na sang sulat ang gobernador sa Maritime Industry Authority (MARINA), Department of Transportation (DOTr) kag sa Philippine Coast Guard (PCG) agud nga hingyuon nga sa Hunyo 1 na lang magabalik sa operasyon ang mga passenger vessels kag passenger airlines.
Suno kay Diaz, nagakahangawa si Lacson kun magasugod na sa pagbiyahe ang mga eroplano kag sakayang pandagat bwas, Mayo 16, kadungan sa pagpaidalom sa probinsya kag sa ciudad sang Bacolod sa General Community Quarantine.
Dugang pa sini, luyag sang gobernador nga mapreparar sang husto ang mga quarantine areas.
Magluwas diri, luyag man ni Lacson nga mangin ‘fully operational’ anay ang COVID-19 testing laboratory sa Teresita Jalandoni Provincial Hospital sa ciudad sang Silay.
Suno kay Diaz, ginatinguhaan nila nga makumpleto na ang mga kagamitan sa masunod nga semana agud makapa-accredit na sa Department of Health.
Ginkumpirmar man ni Diaz nga mahimo na makabiyahe ang mga pampubliko nga salakyan.
Nakadepende naman sa kada local government unit (LGU) ang desisyon sa pagbatak sang liquor ban.
