Indi pa madayon sa Lunes ang biyahe sang mga passenger vessels (fast crafts kag RoRo) nga nagalayag Bacolod to Iloilo vice versa.
Sa interview sang Bombo Radyo Bacolod kay Director Jose Venancio Vero Jr. sang MARINA Region 6, ginkumpirmar sini nga ini ang sabat sa ginpadala nga appeal letter ni Governor Eugenio Jose ‘Bong’ Lacson sang Negros Occidental sa opisina sang Maritime Industry Authority (MARINA) kag Mayor Evelio Leonardia nga nagahingyo nga sa Hunyo 1, 2020 na lamang magaresume bangud sa kahangawa sa coronavirus disease 2019 (COVID-19).
Suno kay Vero, naintindihan naman sang mga operators ang ginahingyo sang Local Government Unit sang syudad kag probinsya bangud indi lamang seguridad sang mga pasahero ang ginaproteheran kundi kalakip man ang seguridad sang mga empleyado .
Dugang pa sini wala sa gihapon sang pulos ang pagbiyahe sang mga ini sa tion nga indi magpadungka ang LGU sang lugar nga padulungan sang mga ini.
Ginhingyo niya ang mga operators sang fast craft nga sa tion nga magresume ang pagbiyahe, indi anay magpasaka sang pamasahe bangud wala ang mga pasahero sang ikasarang nga magbayad sang mahal nga pletehan bangud duha ka bulan nga wala sila sang palangitan-an.
Ginhingyo man sini ang mga operators nga panilagan ang epekto sang tunga lang sang passenger capacity ang mahimo nga makarga sa barko agud mapractice ang social distancing kag kun makita sang mga ini nga tuman na sila ka pierde, mahimo na makapasaka sang pamasahe.
Ginpahayag man sini nga gin-aprubahan naman sang CAAP nga sa Hunyo 1 lamang sila maresume sang pagbiyahe.
Nahibaluan nga nagpagwa man sang EO ang gobernador kag nakasaad nga wala pa ginapahanugutan ang pagbiyahe sang passenger vessel sa probinsya.
