Padayon nga naka-admit sa ospital sa ciudad sang Iloilo ang nagdugang nga kaso sang nagpositibo sa coronavirus disease 2019 (COVID-19) sa probinsya sang Negros Occidental.
Sa interview sang Bombo Radyo Bacolod kay Dra. Ma Sophia Pulmones, focal person sang DOH Region 6, ginpahayag sini nga si Patient WV#102 ang nagatrabaho sa fishing vessel company.
Naghalin ang barko sa Navotas antes pa man magdungka sa Iloilo fishing port sa Tanza Baybay, Iloilo City sang Mayo 11.
Gin-admit ini sa private hospital sa Iloilo City sang Mayo 12 apang nagbatyag na ini sang sintomas sadtong Mayo 3.
May ginpatigayon ang ospital nga x-ray test sa pasyente kun sa diin nakita nga nagasuprer ini sang pneumonia kag gilayon naman ini ginkuhaan sang swab sample agud ipadalom sa real-time reverse transcription polymerase chain reaction (rRT-PCR) test kun sa diin santo sa resulta nga ginpagwa sang Western Visayas Medical Center (WVMC) laboratory, nagpositibo ini sa coronavirus.
Nakig-angot na ang Department of Health (DOH) Region 6 sa City Health Office sa ciudad sang Iloilo agud mapatigayon ang contact tracing sa 17 ka mga crew nga nakaupod sini sa fishing vessel kag sa iban pa nga malapit sa gindungkaan sang barko nga posible nakaupod sang pasyente.
Indi pa mapat-od sa karun kun nakuhaan na sang swab samples ang mga ini bangud padayon pa ang pagpakig-angot sang DOH R6 sa CHO sang Iloilo City agud mahibaluan kun nakuhaan na ang mga ini sang swab samples.
Padayun nga ginamonitor sang mga health officials ang kahimtangan sang pasyente sa ospital kag ginahatagan sang nagakaigo nga pagbulong kasubong man ang mga kaupdanan sini nga nagapabilin sa sulod sang barko.
Nagdangat na sa karun sa napulo ang nagpositibo sa coronavirus sa probinsya sang Negros Occidental.
Nagpanugyan man ini nga ipabilin ang pag-obserbar sang mga interventions agud makalikaw sa balatian kaangay sang social distancing.
