Ginpahayag sang hepe sang Cauayan Municipal Police Station nga ang barangay kagawad kag mga upod sini mismo nga nagapuyo malapit sa ginlupkan sang granada sa banwa sang Cauayan ang ginakabig nga persons of interests sa pagpalupok sini.
Sa interview sang Bombo Radyo Bacolod kay Police Major Lowell Garinganao, ginpahayag sini nga nakabaton sila sang report nga may yara sang ginaalegar nga explosion sang Purok 3, Brgy. Lianon, banwa sang Cauayan, pasado alas 9:00 sang Mayo 14.
Suno kay Garinganao, ginkadtuan sang ila team ang nasambit nga lugar kag suno sa mga residente, may yara ang mga ini sang nabatian nga lupok.
Nahibaluan sa ocular investigation nga granada gid ang naglupok sa atubangan sang balay ni Kagawad Polic Tronio nga nahibaluan naga-inom upod ang pila ka mga lalaki sa ila puluy-an.
Sang ginpamangkot ang mga ini kun may yara sila nabatian nga paglupok, nagpamalibad ang mga ini.
Suno sa hepe, wala naman sang iban nga persona sa lugar gani ginakabig ang mga ini nga persons of interest.
