Ginturn-over na sa ciudad sang Bacolod ang ikaduha nga bio-safe swab mobile nga gindonar sang ThomasLloyd Group kahapon.
Madumduman nga ang una nga bio-safe swab mobile, nga pinakauna sa bilog nga pungsod, ang ginturn-over sa ciudad sang Bacolod Filipino-Chinese Chamber of Commerce and Industry sadtong Mayo 7.
Nahibaluan nga ang ThomasLloyd ang isa ka European investment firm nga shareholder sang BioPower Group.
Nagpasalamat naman si Mayor Evelio “Bing” Leonardia sa BioPower sa paghatag sang bio-safe swab mobile sa Bacolod.
Ginkilala man sini ang team work sang city officials sa kampanya batok sa coronavirus disease 2019 (COVID-19).
Suno sa alkalde, makabulig ini sa pag-protekta sa mga health workers subong man sa mga probable patients.
Paathag sini, imbes nga magkadto ang mga pasyente sa ospital para sa swab test, ang city health staff mismo ang magapadulong sa lugar sang pasyente nga probable case sang COVID-19.
Ang una nga swab mobile ang nakasugod na sa pagkolekta sang mga swab samples nagikan sa mga frontliners sa mga health centers subong man sa mga naka-quarantine nga mga OFWs humalin sang ikaduha nga semana sang Mayo.
Samtang, ang ikaduha naman nga swab mobile ang mangin operational sa tion nga madisinfect na ini.
Nahibaluan nga sanday Engr. Joseph Saril kag ang bata mismo sang alkalde nga si Kara ang nagpanguna sa proyekto. Samtang, may kaugalingon na nga Swab Booth ang Bacolod City Police Office agud nga magamit sa pagtest sang mga PNP Personnel nga nagaserbe nga frontliner sa tunga sang pamahog sang COVID-19 pandemic.
Suno kay BCPO spokesperson Police Lt. Col. Ariel Pico, nag-abot ang swab booth sang Lunes, Mayo 18, kag gindala sang mga personnel sang City Engineers Office.
Suno diri, wala pa ini magamit sang mga personnel bangod wala pa sang nagakaigo nga technical person nga sarang makapatigayon sang swab test.// Nahibaluan nga 34 tanan ang mga inner kag outer border control sa siyudad sang yara pa sa ECQ, kag nakadeploy sa mga ini ang mga PNP personnel.
Suno kay Pico, direktiba gikan sa national government nahanungod sa pagpaidalum sang mga PNP personnel sa swab test bangod sa masami sang mga ini nga pagpangatubang sa madamu nga tawo.
Ang ini nga tikang ang agud man nga makita ang kahimtangan sang mga kapulisan kag kun may ara sa mga ini ang dapat naman nga i-quarantine.
Ang booth ang ginbutang sa ground floor sa bag-o nga building sang BCPO, kag indi man ini pwede mabutang sa gwa sang establisheminto bangod tarpaulin lang ang mga haligi sini.
Samtang nagalaom naman si Pico nga kuntani wala sang may mangin asymptomatic ukon suspected sa mga personnel sini.
Ginklaro naman sini nga may ara man sang regular nga check-up sa mga katapo sang BCPO, apang indi gihapon ang mga ini hilway kun indi maipadalum sa swab test.
