Gin-athag sang chairman sang inter-agency task force against coronavirus sa ciudad sang Bacolod nga wala sang nagakatabo nga second wave sang balatian sa ciudad.
Ini ang kasunod sang pahayag ni Health Secretary Francisco Duque nga yara na karon sa tunga-tunga sang second wave sang COVID-19 ang pungsod.
Nahibaluan nga santo sa pagtuon sang epidemiologist nga si Dr. Wong kag iban pa nga mga eksperto, ang wave ang nagakahulagan sang pagsaka kag pagnubo sang mga kaso.
Ginakabig karon nga first wave ang una nga tatlo ka mga kaso nga narekord sang Enero samtang ang second wave naman ang nagsugod sang Marso.
Sa interview sang Bombo Radyo Bacolod kay Vice Mayor El Cid Familiaran, gin-athag sini nga wala pa nagaka-eksperyensyahan sa ciudad sang Bacolod ang second wave sang coronavirus.
Dugang pa sini nga nationwide ang statistics nga ginbasehan sang DOH.
Paathag pa ni Familiaran nga posible wala pa sang ginatawag nga second wave sa ciudad bangud wala sang mass testing.
Suno pa sa bise alkalde, mas maayo ang mga repatriated overseas Filipino workers (OFWs) ukon iban pa nga mga pumuluyo nga nagikan sa mga quarantine centers bangud na-swab test na ang mga ini kag sigurado nga negatibo sa balatian.
Apang, kadamuan naman sa mga Bacolodnon ang wala nakasiguro bangud posible asymptomatic lang ang mga ini.
Gani liwat nga nagpanugyan si Familiaran nga magsunod sa mando sang gobyerno angot sa health protocol kaangay sang social distancing, pagsuksok sang facemask kag regular handwashing agud malikawan ang paglapta sang virus.
