Patay ang isa ka iloy sa Siyudad sang Bacolod matapos nga ma trap sa nagakasunog nga puluy-an sang ginsulbar sini ang mga alaga nga ido kagina sang aga.
Nagluntad ang sunog mga alas-6:15 sang aga sa puluy-an nga ginapanag-iyahan ni Lilia Mirasol sa Lumboy Street, Capitol Heights Phase 1, Barangay Villamonte, Bacolod City.
Suno kay Fire Chief Inspector Publio Ploteña, Fire Marshall sang Bureau of Fire Protection Bacolod, nakagwa na sa puluy-an ang biktima nga si Michelle Grace Mirasol upod ang bata sini nga lalaki kag ang iloy, apang nag desisyon ini nga magbalik sa sulod sang balay para luwason ang mga alaga nga shih tzu.
Halin sa siyam ka shih tzu nga ido ni Michelle, tatlo diri ang naluwas.
Apang gilayon nga nagdaku ang kalayo, rason kun ngaa wala na makagwa ang biktima kag na-trap ini sa nagakasunog nga balay.
Matapos nga matapna ang kalayo, nakita sang mga bombero ang bangkay sang 35 anyos nga biktima sa sulod sang banyo kag ginalantaw nga suffocation ang kabangdanan sang kamatayun, bangod wala nasunog ang lawas sini.
Suno sa BFP chief, nagsugod ang kalayo tuga sang electrical wiring sa kesame sang balay sang mga Mirasol.
Ginalantaw nga nagalab-ot P100,000 ang balor sang halit nga tuga sang sunog.
