Maga-depende sa rekomendasyon kag evaluation sang Regional Investigation and Detective Management Division sang Police Regional Office (PRO)-6 subong man ni Bacolod City Police Office (BCPO) director P/Col. Henry Biñas kag ni PRO-6 director Brigadier Gen. Rene Pamuspusan kun irelieve ukon ire-assign si Police Major Renante Jomocan, hepe sang Bacolod Police Station 4 bangud sa sunod-sunod nga mga shooting incident sa nasakupan sini.
Sa interview sang Bombo Radyo Bacolod kay BCPO spokesperson P/Lt. Col. Ariel Pico, ginpahayag sini nga may yara sang evaluation nga ginapatigayon kada semana, bulan kag quarterly para sa kada kaso.
Pananglitan nga may yara sang irelieve ukon ire-assign, ang PRO-6 ang naga-evaluate sini.
Gin-athag ni Pico nga indi man gilayon mapahalin sa pwesto ni Jomocan bangud nagapaninguha man ini nga mahatagan sang hustisya ang kada kaso.
Dugang pa sang tagpamaba nga indi buot silingon nga nagasunod-sunod ang shooting incident sa area sang Police Station 4, nagapabaya na ang mga kapulisan.
Madumduman nga gintiro-patay ang negosyante nga si Roland Tan kahapon sa atubang mismo sang baligyaan sini sa Narra Avenue, Barangay Villamonte ciudad sang Bacolod.
