Naka-detain karon sa Bacolod Police Station 6 ang isa ka lalaki nga nagbato sa kapulisan matapos ginsita nga wala nagasuksok sang facemask sa Barangay Taculing ciudad sang Bacolod kahapon.
Sa interview sang Bombo Radyo Bacolod kay Police Captain Elmer Bonilla, hepe sang Police Station 6, ginpahayag sini nga nagikan sa Bangga Cory ang mga pulis apang paglabay nila sa atubang sang Bureau of Internal Revenue (BIR) office sa Hernaez St., Extension, nasiplatan nila si alyas Jake sang Purok Kabukiran sa amo nga barangay nga wala sang facemask.
Ginsaway ini sang mga pulis apang nagdalagan ini kag nagbato pa.
Gilayon naman ini nga nalagas kag nadakpan kag ginposasan antes ginkarga sa patrol.
Suno kay Bonilla, antes ang amo nga insidente, may yara na sang reklamo nga nabaton si alyas Jake matapos sini ginsumbag ang isa ka gwardya.
Mahimo ini magpangatubang sa kaso nga paglapas sa Article 151 sang Revised Penal Code ukon ang disobedience to person in authority in relation and connection sa executive order No. 35 ni Mayor Evelio “Bing” Leonardia.
