Nagapanawagan ang isa ka repatriated overseas Filipino worker (OFW) nga nag-abot sang Mayo 20 kag nahamtang karun sa quarantine facility sa EB Magalona sa provincial government nga kuntani mahatagan sang tikang ang indi maayo nga sitwasyon sang nasambit nga quarantine facility.
Sa interview sang Bombo Radyo Bacolod kay Hazelyn Delante, residente sang Cadiz City, ginpahayag sini nga kun basehan lang ang standard protocol sang quarantine facility, indi gid makapasar ang EB Magalona Healing Center sa ila health safety kag security.
Suno kay Delante, duha na ka persona ang nakaagom sang rashes kag isa diri ang naghubag pa ang duha ka mata sugod sang nagtinir sila sa quarantine facility.
Magluwas diri, sang Huwebes sang aga, may yara sang malaba nga man-og nga nagsulod sa iya nga kwarto samtang ilaga naman ang yara sa kwarto sang isa pa gid ka OFW.
Wala man sang security personnel nga nagalibot kun gab-i gani sila nalang ang nagamato-mato kag bulos-bulos tulog agud may mabantay sa lugar.
Madamo man sang lamok suno sa iya kag sila na lang mismo ang nagadabok agud madula ang mga ini.
Suno sa iya, madamo sang tuktok ang tubig sa mga banyo kag mahinay ang tubod sini; wala sila ginhatagan sang mga habon kag ang ila lang nabaton nagikan sa probinsya ang folding bed; ulunan nga wala sang pilow case; kag isa ka gallon nga tubig.
Suno sa OFW, nagpromisa man ang gobyerno nga pagasayluhon sila sa hotel kun magwa na ang resulta sang swab test nga ginpatigayon sang Huwebes apang nagapanawagan ini gihapon sa probinsya nga kuntani kay-uhon ang akomodasyon kag sundon ang quarantine facility protocols indi lang para sa ila kundi para man sa mga maga-abot pa nga Negrense OFWs kag seafarers.
