Nagdangat na sa P7,500 ang natipon nga bulig matapos magpanawagan sang bulig ang mga ginikanan sang triplets sa banwa sang Ilog nga ginbun-ag nga premature sa ospital sa ciudad sang Kabankalan sang tinalikdan nga inadlaw.
Ini nga kwarta ang nagikan sa mga tawo nga wala nagpakilala kag luyag nga magpadangat sang bulig paagi sa Bombo Radyo Bacolod.
Madumduman nga nagpangayo sang bulig ang 16-anyos nga iloy kag pamilya sini matapos nga magbata sang triplets.
Sa interview sang Bombo Radyo Bacolod sa amay nga si Alvin Lales sang Barangay Canlamay, Ilog, Negros Occidental, ginpahayag sini nga ginamonitor sa karon ang sugar level sang tatlo ka mga lalaki nga lapsag bangud 7 months pa lang ang mga ini sang ginbun-ag sang iloy nga si Shiena Abela sadtong Mayo 16 paagi sa ceasarean section.
Ginpangalanan ang tatlo nga sanday Alex, Zander kag Alexander.
Suno sa 22-anyos nga amay, ginamonitor sang mga doktor sa Lorenzo Zayco District Hospital sa Kabankalan City ang kahimtangan sang triplets kag ginarekomendar sang doktor nga mapalantaw ini sa pribado nga balay-bululngan apang wala sila sang kwarta.
Matapos ang panawagan, ang mga tagpalamati sang Bombo Radyo ang gilayon nga nagpalab-ot sang bulig pinansyal sa mga ini.
