Indi man mapulong nga indi madelay ang pagpauli sang mga nasatranded nga Overseas Filipino Workers (OFW) sa Manila bangud may yara sang kabudlayan sa pagkuha sang clearance nagikan sa national Inter-Agency Task Force.
Sa interview sang Bombo Radyo Bacolod kay Dr. Zeaphard Gerhart Caelian, pinuno sang Provincial Disaster Risk Reduction Management Office (PDRRMO), ginpahayag sini nga may yara sang kapin 78 ka mga manug-abot nga mga stranded OFWs kag santo man sa initial nga listahan nga ginhatag sa opisina sini subong nga adlaw.
Suno kay Caelian wala pa sang husto nga numero sang maga-abot nga stranded Negrense OFWs sa Manila apang may yara sang paagi sa special flight karon sa hapon kag ginabanta nga alas-3:00 sa hapon ang arrival sang mga ini.
Suno pa diri luyag man sini nga makuha in-advance ang numero sang manug-abot nga nastranded bangud ginahatag ini isa ka adlaw ukon mismo sang adlaw nga nakasakay na ang mga ini padulong sa probinsya kag natinguhaan man makuha ang manifesto bangud may yara sang mga LGUs nga nagapangayo agud mahibaluan kun may yara sang constituents sang mga ini nga nakapauli ukon wala.
Suno pa diri may yara man sang manug-abot nga 31 ka mga seafarers sa madason nga semana sakay sa 2GO malasakit voyage.
Suno kay Caelian tunga tungaon ang mga magapauli nga stranded Negrense sa mga quarantine centers agud ma-accomodate ang tanan kag sayluhon naman ang mga OFWs sang team sini sa designated quarantine facility nga ginhanda sang OWWA kag MARINA para sa mga ini.
May yara man sang ibutang sa Mambukal resort bangud bakante naman ini.
Ginpahayag man sini nga 190 ka mga repatriates ang kapasidad sang nasambit nga resort apang kinahanglan nga siguruhon nga may yara nagakaigo nga mga personnel nga mga tsekyar sa mga ini.
Dugang pa sini may yara sang dala nga equipment para sa biolab sa Teresita Jalandoni Provincial Hospital (TJPH) ang magaabot nga sweeper flight subong nga adlaw agud gamiton sa pagpadasig sang testing.
Suno kay Caelian isa man sa vision sang gobernador nga sa tion nga madasig na nga magwa ang resulta sang real-time reverse transcription polymerase chain reaction (rRT-PCR) test pagwaon na lamang ini sa quarantine centers.
Apang samtang wala pa sang available nga testing lab nagakadapat lang nga mapaidalom kag sundon ang mga quarantine period kag precautionary measures ang mga repatriates kag stranded individuals nga nagpauli sa probinsya.
