Nagapati ang Schools Division Superintendent sang Department of Education Division of Bacolod City nga mangin paborable para sa mga manunudlo ang pagpa-iway sang School Year 2020-2021.
Nahibaluan nga ginpahayag ni Presidente Rodrigo Duterte nga indi ini magpasugot nga mabukas ang klase samtang wala pa sang bakuna batok sa coronavirus disease.
Sa interview sang Bombo Radyo Bacolod kay Gladys Amelaine Sales, Schools Division Superintendent sang DepEd Division of Bacolod, ginpahayag sini nga kun indi madayon ang pagbukas sang klase sa nauna na nga pronouncement ni Education Secretary Leonor Briones nga sa Agosto 24, 2020, mas may tiempo ang mga manunudlo nga makapreparar ilabi na kun madayon ang online platform sang pagtudlo.
Gin-athag sini nga samtang wala pa sang written policy, padayon sila sa gihapon sa ila nga trabaho bangud apisar wala sang klase, may yara sila sang mga gina-obra.
Ginkumpirmar man ni Sales nga sa Hunyo 1 magabalik na sa mga eskwelahan ang mga healthy nga mga manunudlo agud nga magpreparar para sa masunod nga school year.
Naga-ayo man ini sa national inter-agency task force kun pwede mapahanugutan ang online classes sa mga kabataan nga may ikasarang ilabi na sa private schools.
Paathag ni Sales nga makaluluoy ang mga private school teachers bangud wala ang mga ini sang sweldo kun wala sang klase.
