Ginapangitaan pa sang Overseas Workers Welfare Administration (OWWA) sang hotel ang mga overseas Filipino workers (OFWs) nga nag-abot kagab-i kag padayon nga nagapabilin sa Bacolod-Silay Airport tubtub subong.
Sa impormasyon nga nakuha sang Bombo Radyo, indi magnubo 35 ka mga OFWs ang nagpaligad sang gab-i sa airport bangud wala sila nagpasugot nga dal-on sa provincial healing center sa EB Magalona.
Suno sa mga OFWs, wala nila naluyagan ang healing center bangud indi manami ang pasilidad.
Nagasentimyento man ang mga ini bangud ang iban nila nga upod ang gindala sa hotel samtang sila ang patiniron sa healing center.
Nagakahangawa man ang mga ini nga mahimo malatnan sila sang coronavirus sa EB Magalona facility bangud diri man nagatinir ang nagpositibo sa virus.
Ginsandigan sang mga ini ang pangako sang OWWA nga sila ang pangitaan sang hotel subong nga adlaw.
Sa pagpakig-angot sang Bombo Radyo kay Jonathan Lobaton, commander sang provincial incident management team sang Negros Occidental, wala pa nakakita ang ahensya sang hotel gani temporaryo lang kuntani ang pagpatinir sa mga OFWs sa healing center.
Suno diri, puno na ang mga hotel nga una ginkontrata sang Kapitolyo kag sang OWWA bangud ginatos ang nag-abot humalin sang Lunes.
Una naman nga ginpahayag ni incident command center spokesperson ChaCha Magallanes Tan nga Go Hotel lamang ang bukas kagab-i gani wala sang butangan sa mga OFWs.
Suno diri, ginhatagan sang prayoridad ang mga nagabusong kag mga kabataan.
