Ginpanindugan sang gobernador sang probinsya sang Negros Occidental nga indi nila pagpiliton ang mga repatriated overseas Filipino workers nga magsakay sa bus nga nagasugat sa ila sa airport kag seaport padulong sa provincial healing center sa banwa sang EB Magalona.
Ini ang kasunod sang pagpaligad sang gab-i sang masobra 30 ka mga repatriated OFWs sa airport bangud indi nila luyag magtinir sa provincial healing center.
Sa interview sang Bombo Radyo Bacolod kay Governor Eugenio Jose “Bong” Lacson, indi sini pagpiliton ang indi luyag magtinir sa EB Magalona apang ginpasiguro sini nga ipaidalom man sila sa gihapon sa quarantine kag testing.
Kinahanglan man maghulat sang mga ini sang bakante nga kwarto sa mga hotel agud nga didto I-quarantine.
Suno kay Lacson, nagligad nga Martes, kulang gid ang tiempo sa pagpreparar sang mga hotel bangud halos tanan ang okupado naman gani napilitan sila nga dal-on ang iban nga batch sang repatriated OFWs sa EB Magalona.
Gin-athag man sang gobernador nga indi basta-basta ang pagtinir sa hotel sang mga OFW bangud nagakinahanglan pa ini sang kontrata nga pirmado sang Overseas Workers Welfare Association (OWWA) nga naga-shoulder sang bayad sa hotel rooms kag sang provincial government nga naga-provide sang pagkaon sa mga ini.
Ginpasiguro ni Lacson nga basta may yara lang sang available nga hotel, dal-on gilayon ang mga ini didto.
Apang kun wala pa, kuntani magkooperar lang anay kag mag-upod sa provincial healing center.
Samtang, ginkumpirmar naman ni Lacson nga posible indi na sila mag-insist sang 14-day quarantine sa mga repatriated OFWs basta mag-negatibo lang ang RT-PCR test result sang mga ini.
