Patay ang isa ka amay samtang pilason naman ang lapsag nga iya ginakugos kadungan sang shooting incident sa banwa sang Sibulan, Negros Oriental.
Ang biktima ang ginkilala kay Reynold “Jun-Jun” Paquit Jr, 34 anyos, residente sang Shin Village, Sitio Campaclan, Brgy. Poblacion, Sibulan, Negros Oriental.
Suno sa live-in partner sang biktima nga si Grecil Alpeche, 22 anyos, witness sa krimen, yara sa gwa sang balay si Reynold samtang ginakugos ang lapsag sang magluntad ang insidente, alas-7:50 kagab-i.
Hinali nalang nga may nagpadulong sa mga ini nga duha ka motorsiklo nga ginasakyan sang 4 ka wala makilala nga mga persona kag hinali nalang ginpaulanan sang bala ang mag-amay.
Naigo sa nagkalain-lain nga bahin sang lawas si Reynold, samtang ang lapsag nga si Terious, anom ka bulan ang edad, ang naigo sa natuo nga batiis.
Narecover gikan sa crime scene ang 9 ka basiyo sang bala sang kalibre 45 nga armas.
Gilayon naman nga nalagyo padulong sa national road ang 4 ka wala makilal-an nga mga suspetsado.
Gindala ang mga biktima sa Negros Oriental Provincial Hospital apang gindeklarar nga patay.
Sa karon, ginatumod pa sang mga pulis ang suspetsado sa krimen.
