Ginaplantsa pa sang Sipalay City government ang mga pagsulundan agud makasugod na ang mga resorts kag iban nga tourist accommodation facilities sang turista kadungan sang modified general community quarantine.
Sa interview sang Bombo Radyo kay Sipalay City Tourism Officer Jerick Lacson, aminado ini nga ang pagbukas sang mga tourist destinations ang ginabantayan sang mga stakeholders.
Ginpahayag sini nga dako nga income ang nadula sa mga resorts kag iban pa nga mga tourist destinations sang nagpatuman sang Enhanced Community Quarantine kag General Community Quarantine bangud nagsanto man ini sa peak season.
Kadungan sang pagpaidalom sang probinsya sa Modified General Community Quarantine (MGCQ), mahimo nga magabukas na ang mga resorts, restaurants kag iban pa nga mga tourist areas sa ciudad.
Apang suno kay Lacson, antes pa man magabukas ukon full operational, hitsuhon anay ang mga pagsulundan sa mga establisyimento kag mga turista agud mangin hilway sila sa pagpanglaton sang virus santo man sa ginpagwa nga Administrative Order 2020-002 sang Department of Tourism kadungan sang new normal.
Suno pa diri, ginahulat pa ang Executive Order angot sa separado nga guidelines sang mga turista kag accommmodation establishments.
Samtang ginpahayag man sini nga ang border checkpoints sang Sipalay ang istrikto man sa pag-inspection sang mga dokyumento sang mga dumuluong kaangay sang certification sang barangay nga nagapamatuod nga indi ini persons under monitoring (PUM) kag health declaration form nga ginstandardize sang DOT.
Bangud sa pandemic, dako naman ang madula nga numero sang turista subong nga tuig kun ikomparar sang nakaligad nga tuig 2019 nga nagdangat ang turista sa 280 mil.
Ang Sipalay ang may yara sang 63 ka mga accommmodation establishments.
