Aminado ang 3rd Infantry Spearhead Division sang Philippine Army nga makabulig ang Anti-Terrorism Act of 2020 sa paglab-ot sang ila handom nga tuldukon ang insurhensya sa tuig 2022.
Sa interview sang Bombo Radyo kay 3rd ID spokesperson Major Cenon Pancito III, nadugangan sa karon ang ila nga tool sa pagpapas sa NPA nga gindeklarar nga isa ka terrorist organization.
Sa idalom sang Anti-Terrorism Law, ang sin-o man nga magsulod sa terrorist organization ang sarang nga mapriso sang 12 ka tuig.
Nahibaluan nga sa karon, wala sang existing nga layi nga nagapenalize sa nagasulod sa NPA bangud tuig 1992 pa sang gin-repeal ang Anti-Subversive Law.
Indi man criminal liability ang pagsulod sa NPA sa idalom sang Human Security Act of 2007 kag sarang man makapyansa ang sin-o man nga akusado sang rebellion.
Apang bangud sa Anti-Terror Law suno kay Pancito nga natalana na nga pirmahan ni Presidente Rodrigo Duterte, nadugangan ang ila gahom agud nga lagson ang mga nagahandom nga maghimo sang terror act.
Suno kay Pancito, suportado sang militar ang amo nga layi.
Aminado ang 3rd ID spokesperson nga nagnubo na ang numero sang NPA sa Western Visayas kun ipaanggid sang tinalikdan nga mga tinuig.
Indi naman kuntani luyag sang Philippine Army nga magdangat sa pinatyanay ang sitwasyon gani padayon ang ila panawagan sa mga miyembro sang komunista nga grupo nga magbalik sa sabak sang gobyerno agud nga makabalik man sa pagpangabuhi sang normal.
