Magabiya na si Fire Chief Inspector Publio “Boboy” Ploteña bilang Bacolod City Fire Marshal kag igasaylo ini sa siyudad sang La Carlota.
Ginalab-ot man sini ang pagpasalamat sa mga nagabulig nahanungod sa mission and vision sang Bureau of Fire Protection (BFP) Bacolod kaangay sang mga pumuluyo, sa gobyerno sang siyudad, sa miyembro sang volunteers brigade, sa chambers kag kasubong man sa mga business sector nga nagakooperar.
Ginapasalamatan man sini ang Bombo Radyo kun sa diin ini una man nga nghalin sang estudyante palang bag-o pa man magsulod sa BFP, kag sa mga pamilya kag mga abyan sa Bacolod City Fire Station nga nagasuporta diri.
Apang labi naman sini nga ginapasalamatan ang Ginoo nga naga-agubay sa desisyon sini sa kada adlaw.
Nahanungod naman sa pagsaylo sini sang fire station, ginpahayag sini nga over-staying na ini sa serbisyo sa siyudad.
Nahibaluan nga kun makalab-ot na sa duha ka tuig, sarang na nga masaylo ang isa ka fire marshal sa lain nga siyudad nga kasubong sini sang ranggo.
Pagabuslan naman ni Chief Inspector Rodel Legaspi ang posisyon nga fire marshal ni Ploteña.
Suno diri, ginaekspektar naman sini ang sitwasyon bangod parte na sang trabaho ang pagreshuffle.
Una na nga nagreshuffle ang regional director sang Enero kag Pebrero apang nabilin ini kasubong man si Legaspi.
Ginapasalamatan man sini ang Provincial Government bangod sa pagdonar sang duta para sa relokasyon sang BFP Bacolod fire station.
Nagapangabay man ini nga padayun pa nga magsanyog ang mga programa kaangay sang dugang nga fire trucks, equipment kag personnel.
Samtang ang siyudad sang La Carlota naman ang nakaplano na nga patindugan sang fire station.
