Nagpahayag man sang pagpamatok sa Anti-Terror Bill si Bishop Gerardo Alminaza sang Diocese of San Carlos.
Suno diri, kaangay sang kadam-an batok man ini sa terorismo apang may mga bahin sang layi nga indi ini kumporme bangud gin-aprubahan lang ini gilayon kag wala na sang may ginbag-o bisan kama ukon tuldok.
Nagapati ang obispo nga wala pa ini mabalanse kag mabutangan sang safety measures para indi maabuso.
Suno diri, nakahambal sa hagna nga ginakonsidera nga kinamatarong, right to life kag dignidad sang isigkatawo, apang ang provision nga nakabutang sa section 25, 26 kag 29 kun sin-o ang mga terorista apang indi ini klaro.
Suno diri, mabudlay ini bangod wala na sang due process kag pwede lang makapapriso nga wala sang warrant of arrest.
Gin-athag sini nga batok ini sa terorismo apang kinahanglan pa gid ini sang dugang nga diskusyon kag pagtuon kag indi padasu-daso.
Gina-aligar man sini nga ginalagas ini kag gindali agud plastado na ini antes ang State of the Nation Address sang presidente.
Suno kay Alminaza, dapat nga makilala ang mga kongregista kun sin-o ang mga nagboto sang yes ukon nagboto sang no.
Samtang may demokrasya pa nga nabilin suno sa obispo, ipahayag gid ang luyag.
Samtang ginpanindugan man sini nga kun batunon man ukon indi ang ginapanindugan, ang importante may ginahimo kag wala nagpabaya.
