Plano kuntani nga magpabukid kag magsulod sa hanay sang New People’s Army sang priso nga nagpalagyo sa Bacolod Police Station 2 sang Biyernes.
Sa interview sang Bombo Radyo Bacolod kay James Brisuela, escapee kag 36-anyos sang Purok Lubi, Barangay 3 sa ciudad sang Bacolod, nagpalagyo ini sa prisuhan bangud indi niya mabaton nga ginplantedan siya sang illegal nga druga sa buybust operation sa Purok Tilapya, Barangay 3 sadtong Mayo 4 kun sa diin nakuhaan siya sang anom tanan ka mga sachet sang shabu nga nagabalor sang 82 mil pesos.
Suno kay Brisuela, nakibot na lamang siya nga may shabu na siya sa iya nga bulsa.
Dugang pa sini, P40 lamang ang iya kwarta sadto nga kita niya sa pagbiyahe sang tricycle kag ibakal niya kuntani sang panyaga.
Ginsaysay naman sini kun paano siya nakapalagyo.
Suno kay Brisuela, pinaagi sa malong nga ginbaruron kag ginhigot sini sa selda, gingamitan sini gilayon sang tubo nga halin sa handle sang pump sa basin, nahimo sini nga mapalos ang tinabuan sang salsalon.
Madali ini nga nakalusot kag gilayon nga nag-agi sa kusina.
Samtang ginpalos naman sini ang duha ka jalousie sa bintana sang kusina kag didto nag-agi agud nga makapalagyo.
Nagpauli ini sa iya pamilya apang tulog pa sadto, gani nagkadto ini sa iya boarding house sa Brgy. Alijis kag didto nagtinir tubtob nakakontak ini sa pamilya niya kag ginpanugyanan nga magsungka.
Sa karon, priso si Brisuela sa Police Station 1 bangud nahadlukan ini nga magbalik sa Police Station 2.
