Aminado ang miyembro sang Negros Occidental Provincial Incident Management Team nga dako nga bulig sa mga Negrense ang pagpatindog sang molecular laboratory sa Teresita Lopez Jalandoni Provincial Hospital.
Sa interview sang Bombo Radyo Bacolod kay Provincial Administrator Atty. Rayfrando Diaz, ginpahayag sini nga mapanubuan na ang pagtinir sang mga Locally Stranded Individuals kag Overseas Filipino Workers (OFWs) sa mga quarantine centers bangud mas madasig na nga maggwa ang resulta sang reverse transcription polymerase chain reaction (RT-PCR) test.
Suno kay Diaz, mahimo na nga makagwa sa tagsa ka mga balay sang mga ini sa tion nga magnegatibo sa test apang kuhaon naman ang nagpositibo agud ma-isolate kag ang pamilya sini ang magapabilin sa home quarantine.
Paagi sa molecular laboratory suno kay Diaz, scientific na ang mangin basehan sang probinsya sa paghambal nga covid free na ang mga pasyente.
Madumduman nga duha na ang nainstall nga reverse transcription polymerase chain reaction (RT-PCR) equipment sa Teresita Lopez Jalandoni Provincial Hospital Molecular Laboratory sa syudad sang Silay.
Suno kay Diaz, nakapatigayon na sang swab testing ang laboratoryo.
Sang Hunyo 3, may yara sang 20 ka mga swab samples ang gintest kag gilayon naman nga naggwa ang resulta kun sa diin nagpositibo ang isa.
Sang Hunyo 4, 30 ka swab samples ang ginpaidalom sa test kag wala sang nagpositibo sang naggwa ang resulta; sang Hunyo 5, may 200 ka swab samples kag Hunyo 6, may 130 ka swab samples kun sa diin lunsay ginahulat nga maggwa ang resulta kag ini ang kabahin sang proficiency week nga santo sa ginpahayag sang gobernador sa press conference sini sang tinalikdan nga semana.
Ang resulta sang swab test sa molecular laboratory sa Silay ang wala pa gin-anunsyar sa publiko bangud ginpasa pa ang test result sa Department of Health Region 6 bangud sila ang magahatag sang go signal agud opisyal ini nga maanunsyar.
Samtang, nagpangabay man si Diaz sa Philippine Coast Guard (PCG) nga makig-angot sa probinsya sa tion nga pasugtan nga makapanaog ang mga LSIs nga nagdungka sa mga puerto agud mapreparahan man bangud nagagutok na ang mga quarantine facilities kag mahimo nga indi na ang mga ini matatapan kay bangud wala na nakapreparar ang probinsya sa ila nga pag-abot.
