Apisar nga naghalog na ang patakaran sang ciudad angot sa community quarantine sa paglikaw sa paglaton sang coronavirus disease 2019 (COVID-19), may apela ang chairman sang Inter-Agency Task Force Against Coronavirus sa ciudad sang Bacolod.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga mangin mahinalungon ang mga pumuluyo samtang nagapadayon ang pagpakigbato sang pungsod sa coronavirus disease 2019 (COVID-19).
Suno diri, dapat sundon ang mga precautionary measures kag indi gid maghatag sang kompiyansa.
Suno kay Familiaran, bangud nagapasulod naman sa tig-ululan, dapat mangin vigilante ang tanan bangud sa dengue kag leptospirosis nga balatian magluwas sa coronavirus.
Ginpahayag man sini nga padayon nga mangin mainandamon ang mga pumuluyo sa tagsa ka pamilya paagi sa pagsige-sige nga pagpaandam nga halungan ang tagsa ka kaugalingon agud malikawan ang mga balatian.
