Padayon pa nga nakahunong sa Bacolod City Police Station 1 ang priso nga nagpalagyo sa Police Station 2 sadtong Hunyo 5, 2020.
Sa interview sang Bombo Radyo Bacolod kay Police Major Jovil Sedel, station commander sang Police Station 1, ginpahayag sini nga nahadlok magbalik sa Police Station 2 si James Brisuela sang Barangay 3.
Suno kay Gever, magapabilin sa Police Station 1 si James Brisuela samtang ginahulat ang commitment order kag maendorso ini sa Bureau of Jail Management and Penology (BJMP).
Madumduman nga nagsungka ang suspetsado sa Police Station 1 sadtong Hunyo 6 matapos nga nagpalagyo kag nagpauli sa iya pamilya sa Barangay 3 apang tulog pa ang mga ini gani nagkadto siya sa iya boarding house sa Brgy. Alijis kag didto nagtinir tubtob nakakontak ini sa iya pamilya kag ginpanugyanan nga magsungka.
Paagi sa bulig ni Punong Barangay Bob Asan sang Barangay 3 kag nagdesisyon nga magsungka sa Bacolod City Police Office headquarters si Brisuela antes gin-endorso sa Bacolod City Police Station 1 para man sa seguridad sini bangud nahadlukan siya nga magbalik sa Police Station 2.
Nahibaluan nga ang suspetsado ang napriso matapos nadakpan sa kaso sang illegal nga druga sadtong Mayo 4.
Madumduman nga pinaagi sa malong nga ginbaruron kag ginhigot sini sa selda, gingamitan sini gilayon sang tubo nga halin sa handle sang pump sa basin, iya nga napalos ang tinabuan sang salsalon.
Madali ini nga nakalusot kag gilayon nga nag-agi sa kusina.
Samtang ginpalos naman sini ang duha ka jalousie sa bintana sang kusina kag didto nag-agi agud nga makapalagyo.
Wala naman ini natalupangdan sang nagabantay nga pulis kag nahibaluan nalang nga nakapalagyo na siya sang nagpanugid ang priso nga nadakpan sa drug buybust nga nakasaksi sa pagpalagyo ni Brisuela.
Suno kay Sedel, mahimo man nga madugangan ang ipasaka nga kaso sa suspetsado apang nakadepende ini sa ginpasaka nga kaso sang Police Station 2.
