Ginkumpirmar sang pinuno sang Coast Guard Station-Negros Occidental Commander Jansen Benjamin nga may yara na sang biyahe ang mga fastcraft kag roro vessels nga nagalayag Bacolod-Iloilo vice versa sumugod sa Hunyo 15.
Nahibaluan nga nagpatigayon sang pagsinapol kahapon ang mga opisyal sang ciudad sang Bacolod kaupod ang mga shipping companies, Philippine Ports Authority, Maritime Industry Authority(MARINA) kag PCG agud hambalan ang mga protocol nga dapat sundon kag ipatuman sa pagbalik sang commercial sea travel sa maunod nga semana.
Sa interview sang Bombo Radyo Bacolod kay Benjamin, ginpahayag sini nga limitado lamang sa mga locally-stranded individuals (LSI’s) kag mga Authorized Persons Outside Residence (APOR) ang maka-biyahe.
Suno kay Benjamin, kinahanglan sang mga LSI’s nga mag-comply sang mga requirements nga medical certificate kag travel authority agud nga maka-biyahe.
Samtang, basic company ID lamang ang dapat nga ipakita sang mga APOR ukon mga taga-Iloilo nga naga-trabaho sa Bacolod ukon mga residente sang Bacolod nga naga-trabaho sa Iloilo agud makasakay.
Samtang, ginkumpirmar naman ni Vice Mayor El Cid Familiaran, chairman sang inter-agency task force against coronavirus sa Bacolod nga ipaidalom gid sa RT-PCR test ang mga pasahero nga maga-abot sa ciudad agud masiguro nga indi sila infected sang virus.
Dugang pa sini nga magasunod sila sa ipatuman nga protocol sng probinsya sa Bacolod-Silay Airport samtang dapat mag-kooperar man sa protocol sang mga pantalan sa ciudad ang provincial government.
Ginalauman nga magpagwa sang executive order si Mayor Evelio Leonardia angot diri.
