Gindagdagan sang gobernador sang 60-day preventive suspension ang duha ka department heads sa Kapitolyo sang Negros Occidental epektibo kahapon.
Sa interview sang Bombo Radyo Bacolod kay provincial administrator Atty.Rayfrando Diaz, ang preventive suspension ang gin-isyu agud imbestigaran ang administrative charge batok kay Provincial Budget Officer Jose Percival Salado Jr. kag Mambukal Resort head Ellen Marie Jalandoni.
Suno kay Diaz, ang preventive suspension ang kasunod sang reklamo sang Commission on Audit kag Internal Audit kag ini ang naumpisahan na nga imbestigaran sadtong Disyembre pa apang gin-untatan lang bangud indi luyag sang probinsya nga updon ang pag-imbestigar sa kaso kag pagpangatubang sang krisis.
Ang preventive suspension kay Salado ang may angot sa 45% nga sobra sa budget ceiling sang Personal Services.
Ginpahayag man ni Diaz nga ang imbestigasyon ang nagikan sa independent bodies sang ahensya sang gobyerno kag indi iya sang provincial officials.
Sarang man nga makahatag sang position letter ukon formal nga hearing ang mga akusado kun sa diin kinahanglan nga magappoint sang hearing officer kag kinahanglan nga may abugado kag mahatag man ang probinsya sang prosecutor nagikan sa provincial legal office.
Ginkompirmar man ni Diaz nga may yara man sang show cause order batok kay Ma. Mina Pellejo sang Negros Occidental Comprehensive Health Program (NOCHP).
Ginpahayag man sini nga wala sang show cause order batok kay Tina Basa Orbecido sang Negros Occidental Language and Information Technology Center (NOLITC) kag Karen Dinsay nga head sang Negros Occidental Scholarship Program Division.
Samtang ginpahayag man ni Diaz nga wala sang lamud pamulitika ang pagpagwa sang preventive suspension batok sa mga department heads.
Suno diri, kun may yara sang pamulitika kuntani ginpahalin na ang mga ini sang una pa lang nagpungko ang gobernador apang nagapadayon ang mga ini sa pagserbisyo.
Luyag lamang sang gobernador nga malimpyuhan ang records sang mga department heads sa anuman nga anomaliya.
