Ginakondenar sang Bacolod City Police Office (BCPO) ang pag-ambush kay Police Staff Sergeant Miguel Perez III sadtong nagligad nga Domingo sa Purok Camelot, Brgy. Estefania, ciudad sang Bacolod.
Sa interview sang Bombo Radyo Bacolod kay BCPO director Police Col. Henry Biñas, ginpahayag sini nga ginatinguhaan sang kapulisan sa Bacolod Police Station 4 nga masolbar ang krimen kag madakpan ang mga may kahimuan sa pagpaarak-luthang sa salakyan ni Perez.
Dugang pa ni Biñas, nagapakig-angot naman sila sa biktima agud mahibaluan ang possible nga motibo sa pagtuyo nga pagpatay sa iya.
Isa sa mga ginalantaw nga anngulo sang mga pulis karon amo ang kaangtanan sa trabaho subong man personal nga hiligut-anon.
Nagpanugyan naman ang city director sa mga pulis nga magdoble halong gid bangud nga delikado ang ila kabuhi.
Nagapatuman sila karon sang squad, kun sa diin ang kada squad ang may yara sang walo ka mga personnel.
Paagi diri suno kay Biñas, mahibaluan sang tagsa ka squad sang mga pulis ang ila aktibidad kun naka-off duty ng mga ini.
Sa karon, gina-review na sini ang deployment sang mga police personnel sa mga crime prone areas.
Nagpanugyan man ini sa publiko nga may yara sang pamahog sa kabuhi nga magpakig-angot sa BCPO.
