Nagalaom ang isa ka repatriated overseas Filipino worker (OFW) nga naka-facility quarantine karon sa isa ka hotel sa ciudad sang Bacolod nga mapadali na ang paggwa sang swab test result nila bangud nga naglapaw na sila sa mandatory 14-day quarantine.
Sa interview sang Bombo Radyo Bacolod kay alyas Toto, ginpahayag sini nga sang Hunyo 8 pa kuntani natapos ang ila nga quarantine apang indi pa sila makapauli sa tagsa nila ka mga panimalay bangud wala pa naggwa ang ila nga resulta.
Suno diri, ginkuhaan sila sang swab sample sadtong Hunyo 1 kag ginpromisahan sila nga magwa ang resulta pagkatapos sang isa ka semana.
Suno sa OFW, nakapoy kag na-stress na gid sila sa sitwasyon bangud isa na sila ka bulan nga naka-quarantine sa barko, duha ka bulan sa Manila, kag masobra duha na ka semana sa Bacolod.
Dugang pa sini nga nahidlaw na gid sila sa ila nga pamilya.
Nahibaluan nga 14 sila tanan ka bilog sa iya nga batch nga wala pa nakagwa ang test result.
Samtang, ginpasalig naman ni Bacolod City Lone District Congressman Greg Gasataya ang mga OFWs nga gina-follow up na niya ang amo nga isyu sa Department of Health Region 6.
Suno kay Gasataya, nagpangabay na ini kay DOH-6 Regional Director Marlyn Convocar nga I-prioritize kuntani ang Bacolod.
Ginpahayag naman ni Convocar nga may yara karon sang masobra isa ka libo nga backlogs kun sa diin 600 diri ang iya ka ciudad.
Ginkumpirmar naman sang kongresisya nga naka-istoryahanay na sila ni anay 3rd District Cong. Albee Benitez nga pwede na makapadala sang swab sample ang Bacolod sa molecular laboratory sang Teresita Lopez Jalandoni Provincial Hospital.
Ginkumpirmar naman ni Provincial Administrator Atty. Rayfrando Diaz nga nagpatigayon na sila sang re-swabbing sa mga repatriated OFWs nga naglapaw na ukon manug-tapos na sa ila nga mandatory quarantine kag ginpadala sa molecular laboratory sa ciudad sang Silay bangud wala pa man makagwa ang mga test results sang mga ini nagikan sa Iloilo.
