Nagpatigayon kahapon sang pagsinapol ang mga opisyales sa Western Visayas agud hambalan ang ekonomiya sang rehiyon subong nga may yara sang COVID-19 pandemic.
Ang amo nga meeting nga ginhiwat sa Iloilo City Hall ang gintambungan nanday Iloilo City Mayor Jerry Treñas, Iloilo Governor Arthur Defensor Jr., Antique Governor Rhodora Cadiao, Guimaras Governor Samuel Gumarin, Capiz Governor Esteban Contreras, Aklan Governor Florencio Miraflores, Negros Occidental Governor Eugenio Jose Lacson, Alfredo Benitez nga anay 3rd district Representative sang Negros Occidental kag tiglawas sang Bacolod City nga si Atty. John Orola.
Sa interview sang Bombo Radyo Bacolod kay Governor Lacson, ginpahayag sini nga ang tinutuyo sang pagsinapol amo nga istoryahan kun paano mapasanyog kag mabuksan liwat ang ekonomiya sa Region 6.
Ila nahisugtan suno kay Lacson nga magtukod sang isa ka technical working group agud nga maplanuhan sang husto ang pagbalik sang ekonomiya sa Western Visayas.
Nahibaluan nga tuman ka apektado sang pagsira sang mga negosyo bangud sa COVID-19 ang Aklan.
65 porsyento sang ila nga income ang nagikan sa local income.
Suno kay Lacson, pagabisitahon subong nga adlaw ni Tourism Secretary Bernadeth Puyat ang isla sang Boracay agud ma-assess kun pwede na ini buksan sa mga local tourists.
