BACOLOD CITY-Duha ka ginaalegar drug personalities ang arestado sa drug buybust operation nga ginpatigayon sang mga pulis sa Purok Lawayan, Barangay Banago, Bacolod City kagab-i.
Ginpatigayon ang drug buybust operation alas-5:24 kagab-i kag nadakpan sanday Ike Pabillo alyas Ike, 41 anyos, single, residente sang nasambit nga lugar kag si Rolando Padilla, 35 anyos, may asawa, kag residente sang Brgy. Taculing, Bacolod City.
Nakumpiskar sa mga suspetsado ang 10 ka sachet sang ginasuspetsuhan shabu, P200 nga marked money, P400 nga cash, kag mga drug paraphernalia.
Ang droga ang nagabug-at sang tatlo ka gramos kag ginabanta nagabalor sang P20,000.
Ang mga suspetsado ang nakahunong na sa Bacolod City Police Station 3 kag ginahanda na sang mga pulis ang kaso nga paglapas sa Republic Act 9165 ukon Comprehensive Dangerous Drugs Act of 2002 nga ipasaka batok sa ila.
Sa pihak nga bahin, arestado naman ang isa ka wanted person nga nagapangatubang sang kaso nga pagbayolar sa Republic Act 8424 ukon ang national internal revenue code of 1997.
Ang suspetsado ang ginkilala kay Roy Robert Mirasol, 52 anyos, nagapanag-iya sang Mirasol Tire Supply sa Rizal St., Brgy. 21, Bacolod City.
Gindakop ini sa nasambit nga lugar pinaagi sa warrant of arrest kag subpoena nga gin-issue sang Marso 16, 2020.
Ang suspetsado ang yara sa karon sa kustodiya sang Bacolod City Police Station 1.
P4,000 ang pyansa nga gintalana sang korte para sa iya temporaryo nga kahilwayan.
