Ginlockdown na ang Barangay Zone 4-A sa ciudad sang Talisay kasunod sang pagpositibo sang isa ka 24 anyos nga babayi nga locally stranded individual nagikan sa Cebu.
Sa interview sang Bombo Radyo Bacolod kay Punong Barangay Remo Persia sang Barangay Zone 4-A, Talisay City, ginkumpirmar sini nga gindala na sa Provincial Healing Center sa banwa sang EB Magalona si Negros Occidental Patient No. 15.
Suno diri, nag-abot ang pasyente sa Escalante port sadtong Hunyo 6 kag ginsugat sang iya amay kag barangay kagawad.
Gindul-ong ini sa quarantine facility sang ciudad nga nahamtang sa Rafael B. Lacson Memorial High School sa Barangay Zone 12.
Ginkumpirmar man ni Persia nga gilayon nga nagpauli sa ila barangay ang amay sang pasyente kag ang barangay kagawad.
Ginkuhaan naman sang swab sample ang mga naka-close contact ni Patient No. 15.
Suno sa punong barangay, ilockdown nila ang ila lugar tubtob nga maggwa ang test result sang mga ini.
Nagapahanumdom man ini sa iya mga pumuluyo nga indi mag-panic kag magsunod gid sa standard health protocol agud malikawan nga matapikan sang virus.
Nahibaluan nga magluwas kay Patient No. 15 sang Talisay City, nagpositibo man sa coronavirus si Patient No. 14 nga isa ka 29-anyos nga lalaki nga taga-Sagay City.
Isa ini ka LSI nagikan sa Cebu kag nag-abot sa probinsya sang Hunyo 5.
Si Patient No. 16 ang isa ka 35-anyos nga lalaki nga residente sang banwa sang Cauayan.
Isa man ini ka LSI kag nag-abot sa probinsya sang Hunyo 5 nagikan sa Cebu.
Kag si Patient No. 17 ang isa ka 40-anyos nga repatriated OFW nga nag-abot sa Manila sang Abril 20.
Nakapauli ini sa Negros Occidental sang Hunyo 7 kag tumandok ini sang Sagay City.
Lunsay naka-facility quarantine karon ang mga pasyente.
Ang patient no. 18 naman sang Bacolod ang personal driver ni Board Member Valentino Miguel Alonso.
Gilayon nga nagpaidalom sa swab test si Alonso apang negatibo ini sa COVID.
Suno sa board member, pila na ka semana nga wala sila nakakitaay sang patient no. 18.
