Extended ang modified general community quarantine sa ciudad sang Bacolod, probinsya sang Negros Occidental kag iban nga bahin sang pungsod tubtub Hunyo 30 may kaangtanan sa COVID pandemic.
Gin-extend naman ni Presidente Rodrigo Duterte ang general community quarantine sa Metro Manila tubtob sa Hunyo 30 samtang ginpaidalum naman sa enhanced community quarantine ang Cebu City bangud sa pamahog sang coronavirus disease 2019 (COVID-19) sa pungsod.
Ang nasambit nga tikang ang nadesisyunan ni Duterte matapos ang deliberasyon nga ginpatigayon kaupod ang Inter-Agency Task Force Against Coronavirus nga naghatag sang mga rekomendasyon sa presidente tuhoy sa mga restrictions.
Ang Talisay City ang ginpaidalom sa modified enhanced community quarantine samtang ang NCR, Cagayan, Isabela, Nueva Vizcaya, Quirino, Santiago City in Region II; Aurora, Bataan, Bulacan, Tarlac, Olongapo City in Region III; Cavite, Laguna, Batangas, Rizal, Quezon sa Region IV-A, kag Occidental Mindoro sa Region IV-B ang ginpaidalum sa GCQ sa Luzon.
Sa Visayas, nagapabilin sa GCQ ang Bohol, Cebu, Negros Oriental, Siquijor, Mandaue City kag Lapu-Lapu City samtang Davao City kag Zamboanga City naman sa Mindanao.
Ang nabilin nga bahin sang pungsod ang nagapabilin sa modified general community quarantine.
Suno kay Presidential Spokesperson Harry Roque, ang data sang pagdoble sang mga kaso, critical care capacity kag ang ekonomiya ang ginbasehan kun ipabilin, hugton ukon pahalugon ang mga restrictions sa tagsa-tagsa ka rehiyon.
