Ginkompirmar sang operator sang Weesam Express nga magabalik na sa pagbiyahe ang fastcraft nga nagalayag Bacolod-Iloilo vice versa subong nga adlaw Hunyo 20.
Sa interview sang Bombo Radyo Bacolod kay Frank Carbon, ginpahayag sini nga anom lang ka trips pakadto sa Bacolod kag anum man padulong sa Iloilo.
Ginpahayag man sini nga magasunod sila sa tanan nga protocols sa idalum sang new normal.
Suno kay Carbon, 1 seat apart ang mga pasahero agud mapractice ang social distancing.
Masami nga magdala sang valid identification card bangud ini ang pangitaon kun maggawad sang ticket kag antes magsakay kag ini man ang basehan sang seat plan para sa tion nga kinahanglanon sa contact tracing.
Gin-athag man sini nga dapat may yara sang travel pass ang Overseas Filipino Workers (OFW).
Wala naman sang swab test ang mga residente sang Bacolod apang ang mga residente sang probinsya ang mapaidalom sa gihapon sa swab test santo sa mando ni Negros Occidental Governor Eugenio Jose “Bong” Lacson.
Dugang pa sini nga dapat magsuksok sang face mask, masami magpanghugas sang kamot kag magdala sang kaugalingon nga alcohol.
Nagpanugyan man ini sang travel light agud madasig makasakay kag madasig man makapanaug sa barko.
Ginpahayag man ni Carbon nga wala anay sang pagpasaka sang pletehan sa barko bangud panilagan pa nila ini sa sulod sang duha ka semana kun bala masarangan na sang mga tawo ang magtravel apisar nga nagsaka ang presyo sang diesel.
Ginpasalamatan man ni Carbon ang city government sa pagpahanugot nga makabalik na sila sa pagbiyahe bangud sarang na mapadasig ang pagbalik sang ekonomiya bangud nagbalik na ang biyahe.
Dugang pa sini nga dako kag madamo ang mabuligan kadungan sang pagbukas sang port kag pagbalik sang biyahe.
Magahatag man ang mga ini sang abiso sa publiko kag sa Maritime Industry Authority (MARINA) sa sulod 15 ka adlaw antes pa ini ipatuman.
