Nagdangat na sa 28 ang COVID-19 positive cases sa syudad sang Bacolod matapos madugangan sang isa kahapon.
Santo sa pinakaulihi nga data nga ginpagwa sang City Health Office, si Bacolod Patient No. 28 ang isa ka 23-anyos nga lalaki kag isa ka seafarer nga may port of exit sa Brazil sadtong Abril 11, 2020.
Gin-admit ini sa ospital sang Brazil sa sulod sang 19 ka adlaw bangud sa coronavirus.
Gindischarged ini sang Abril 11 matapos mag-improved ang kondisyon.
Naglupad ini padulong sa Manila sa pareho nga adlaw.
Nagpaidalom sa quarantine sa Manila tubtob Hunyo 10 kag ginpaidalom man ini liwat sa repeat RT-PCR test isa ka semana antes pa ang pagpauli sini sa syudad sang Bacolod kun sa diin nagnegatibo ang resulta.
Si Patient No. 28 ang ginpaidalom liwat sa RT-PCR test sang ini ang nakaabot na sa siyudad kag sang naggwa ang resulta, nagpositibo ini.
Sa karun padayon nga nagapabilin sa quarantine facility ang pasyente kag nagapabilin man nga asymptomatic.
Samtang nagdangat naman sa 37 ang positibo nga kaso sang coronavirus disease sa probinsya sang Negros Occidental matapos madugangan sang siyam ka mga nagpositibo kahapon kun sa diin anom sa mga ini ang LSIs nagikan sa Cebu kag Manila samtang tatlo naman ang repatriated OFWs.
